Ingurumen, Landa eta Itsas Inguruneko Ministerioak 700 metro koadroko standa antolatu du FITUR 2011rako. Bertan landa-garapeneko taldeen intereseko lankidetza-proiektuak erakutsiko dira.
Aipatu proiektuen artean daude ‘Europa erromanikoa’ eta Reto-Natura 2000′. Cederna Garalur Elkarteak bi proiektu horietan parte hartzen du, hurrenez hurren honako hauek lortze aldera:
- Proiektuan bazkide diren lurraldeetan ondare erromanikoa interpretatzeko eta kudeatzeko bideak topatzea.
- Natura 2000 Sarearen lurraldeetan natura behatzeko turismo-produktua gauzatzeko estrategia argia diseinatzea eta proposatzea.
Ingurumen, Landa eta Itsas Inguruneko Ministerioaren standaren helburua da gure herrialdeak landa-turismo jasangarria garatzeko duen aukera erakustea; bai lurraldearen bitartez (biosfera-erreserbak), non modu arduratsuan eta jasangarrian lurraldearen garapena sustatzen duten jarduerak lantzen baitira, baita landa-eremutik beretik sortzen diren ministerioarena bezalako proiektuen bitartez, nortasun propioa izanen duen turismo-esperientzia, sektoreak ohikoa duen turismo-eskaintzarekiko bestelakoa, emate aldera. Ministerioaren aipatu proiektuak lurraldearen eta proiektuak gauzatzea ahalbidetzen duten pertsonen arteko lotura dira.
Aukeratutako proiektuak gaika multzokatu dira, eta standaren bisitariari gaikako hainbat ibilbide-aukera eskaini zaio: transhumantzia, turismo ornitologikoa, kultur ondareko ibilbideak, landa-eremuetako termalismoa, eta landa-gastronomia eta enoturismoa.
Proposatutako jarduerak
Proiektu bakoitzak bere lekua izanen du standean, bakoitzak bere jarduera, produktuak eta lana aurkezteko. ‘Reto Natura 2000’ri dagokionez, ‘Landa Xedea’ argitalpenarekin egindako lana nabarmenduko da; izan ere, ale osoa eskaini die proiektuko kide diren lurraldeei. Argitalpena doan banatuko da Fitur-en. Horrez gain, urtarrilaren 22an proiektuaren berri emanen dute.
‘Europa erromanikoa’ proiektuari dagokionez, hori ere larunbatean aurkeztuko dute, goizez. Halaber, azoka-egunetan ondare erromaniko garrantzitsua duten eta ondare hori xarma turistiko kultural gisa izan dezaketen lekuak proiektatuko dira.
Beste urte batez, turismo-sektoreak hitzordua du Madrilen, nazioartean osperik handien duen azoketako batean. Esan dezakegu, Cederna Garalur Elkarteak 2011 honetan protagonismo berezia hartu duela iaztik lantzen ari den eta arian-arian emaitzak ematen ari diren lankidetza-proiektuen barnean.
